امتحان 2009

موضوع: امتحان 2009 الأحد سبتمبر 28, 2008 9:15 pm

بسم الله الرحمن الرحيم

الامتحان الجاى مش مهم نجاوب عليه كله بس ياريت نفكر فى حل للاسئلة اللى فيه عشان ناوى اسال فيه كل واحد اشوفه , ولا عايزين يقولوال علينا مش عارفين بلدنا وامتحاناتنا .
الامتحان متقسم زى امتحان العربى بتاع زمان يعنى اللى مش هيحلوا يبقا اكيد خريج مدارس خاصة معداش على امتحانات عربى قبل كدة :

موضوع: التعبير الأحد سبتمبر 28, 2008 9:20 pm

السؤال الاول : لتعبير

ا
اكتب ما لايقل عن 650 سطر فى أحد الموضوعات التالية :

1- لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة

2- شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 6500 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز

3- بعد انتشار ظاهرة أكل لحم الكلاب والحمير..من وجهة نظرك كحمار تكلم عن هذه الظاهرة ومن المتسبب فيها بدون غلط..الورق متراقب

موضوع: القصة الأحد سبتمبر 28, 2008 9:23 pm

لسؤال الثانى: القصة

من قصة ' وعهد الله ما انت داخل الانتخابات' .. اقرأ القطعة وأجب عن الآتى :
> ثم أتى إليه وضربه بالجزمة وقال: انت عايز تترشح فى الانتخابات يامعفن؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى؟

1- ما هى اللحمة؟ أو على الأقل حدد أقرب معنى خيالى لها

2- مرادف معجزة فى اللغة ( تغيير وزارى – زيادة المرتبات – رغيف العيش) اختر يا مقلول البخت

3- لماذ ضربه الرجل بالجزمة وليس بالعصى مثلا؟؟
أهو كسل .. لسة هيرفع العصاية؟ - عشان العصاية قلة قيمة برضه واحنا فى عصر الديمقراطية – عشان العصاية شغالة مع واحد تانى..اختر

4- حلل بمزيد من التفصيل جملة ضربه بالجزمة ومدى توافقها مع جملة مصر بتتقدم بينا

موضوع: القراءة الأحد سبتمبر 28, 2008 9:25 pm

السؤال الثالث القراءة :

> من موضوع ( الزعيم..و الفنان.. والقدوة) اقرأ القطعة وأجب :
وقد نفى الزعيم عادل إمام الإشاعات التى أكدت أنه مرشح لوزارة الثقافة.. وأكد أنه فنان فقط وليس سياسيا الخبر حقيقى كما أنه يرحب بالتوريث ومقتنع بكل سياسات الحكومة

1- ذكرنا فى الدرس أن عادل إمام سيتقاضى فى فيلمه القادم 12 مليون جنيه.. فى رأيك ياعم المحروم تبقى البوسة بكام فى الفيلم؟؟

2- دخل كاتب هذه السطور مسرحية بودى جارد للزعيم رغم قرفه منه أساسا.. فى رأيك ما السبب فى دخوله؟
أكيد معزوم – طبيعى معزوم – وربنا معزوم.. اختر على أن تضع إيدك على المصحف وانت بتحلف للمراقب بتاع اللجنة

موضوع: نصوص 1 الأحد سبتمبر 28, 2008 9:28 pm

لسؤال الرابع النصوص :

> أجب عن أحد النصين الآتيين :

> من نص ( ماشربتش من نيلها)..اقرأ ثم أجب :

> ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكى لها

1- بعد رغبة صاحبة النص فى أن تلد ابنتها فى أمريكا لتحصل على الجنسية الأمريكية..اختر..ما المقصود بنيلها فى النص؟
المسيسبى - الأمازون – يونج يانج

2- هذا النص من نصوص الحزب الوطنى والدليل وجود اسم مهم من قيادات الحزب فى النص.استخرج الاسم..وبوسه من بُقـُّه ورجَّعُه مكانه

3- أكمل الأبيات إلى آخر كحكة فى الكليب

4- قوبل النص بانتقادات بسبب بعده عن الواقع..وضح من النص ما يتفق مع القول المأثور اطبخى ياجارية .. كلف يا سيدى

موضوع: نصوص 2 الأحد سبتمبر 28, 2008 9:30 pm

من نص حين( ميسرة)..أجب عن الآتى :

1- اذكر اسم مصيبة واحدة محصلتش فى النص الأسود ده

2- وضح عبقرية أحمد بدير الإرهابى فى النص وهو يكتب رسالة على الكمبيوتر باستخدام أزرار الأرقام فقط ومفيش حروف.. ويعطى أمر التنفيذ بزرار قايمة ستارت مش بإنتر.كمبيوتر إرهابى بقى

3- سبب وجود الشرطة كل خمس دقائق فى النص :
موسم ترقيات عقبال أملتك ولازم شغل – أخو خالد يوسف ظابط ولازم يخدم أخوه – عشان الشرطة بتراقب قسم البوليس اللى جنب أحداث النص ........ اختر

موضوع: النحو الأحد سبتمبر 28, 2008 9:33 pm

السؤال الخامس النحو :

1- أعرب ما تحته خط.. لو مالقيتش القطعة أصلا اتصرف..

2- ذهب الرئيس إلى المؤتمر .. ضع الجملة السابقة فى صيغة المثنى.. ماعدا الرئيس طبعا ياكلب

3- كان ممدوح إسماعيل قاتلا .. ضع إن مكان كان.. على ألا تنصب ممدوح.. عشان هوه بينصب لوحده

4- فُرِضت الضرائب علينا ببشاعة ..أعرب الجملة .. وارفع الضرائب أبوس إيدك

موضوع: الخط الأحد سبتمبر 28, 2008 9:34 pm

السؤال السادس الخط :

> كوز المحبة انخرم..طرطش على كمى..ياحبيبى بطل جفا وارحم عذاب امى

اكتب الجملة السابقة ثلاث مرات

موضوع: رد: امتحان 2009 الإثنين سبتمبر 29, 2008 2:59 am

ههههههههههههههههههههههههههههههههههههههه امتحان جاااااااااااااامد بس صعب اوى شكلى كنت فى مدارس خاصة
بجد موضوع حلو ودمة خفيف وتسلم ايدك
بس مستنية تغششنى اجابة الامتحان

موضوع: رد: امتحان 2009 الخميس أكتوبر 16, 2008 11:09 pm

طول عمرك جامد يا وات بس نصيحه بلاش تتكلم في السياسه ربنا يسترها معانا Evil or Very Mad

موضوع: رد: امتحان 2009 السبت أكتوبر 18, 2008 1:24 am

احلى امتحـــــــــــــــــان عربى شوفته فى حياتـــــــى

بجد يا روميو جــــــــــامد اخر حاجه ساخر موووووووووووووووووووووووووووووووووووت

clown

موضوع: رد: امتحان 2009 الخميس أكتوبر 30, 2008 5:23 pm

جامد جدا جدا جدا

بس أنا عايز أعرف ليه ماتكتبش فى مشاركة واحدة كله